2014 chega ao seu fin. Un ano intenso para a nosa cidade, marcado novamente por unha apretada axenda mobilizadora. Repasamos o que deu de si o ano que conclúe cunha selección de doce imaxes.
Xaneiro: Contra os desafiuzamentos
Con seguridade a primeira protesta do ano. A PAH de Vigo concentrábase na Praza do Rei para exixiren ao Concello de Vigo unha solución para Analía, que enfrontaba un desafiuzamento. [Imaxe: PAH]
Febreiro: A sombra de corrupción na Praza do Rei
#OperaciónPatos en el Concello de Vigo pic.twitter.com/hRM2cNn03B
— Felipe Carnotto (@FelipeCarnotto) 18 fevereiro 2014
No marco da operación "Patos" contra a corrupción nos concellos, a policía rexistraba as dependencias de varios departamentos municipais en Vigo, entre elas os despachos dos concelleiros Ángel Rivas e David Regades. Este mesmo ano Rivas resultaría imputado acusado de prevaricación. [Imaxe: Felipe Carnotto]
Marzo: O cerco revólvese
Os mariñeiros da flota do cerco deixaron constancia da súa desesperada protesta nas rúas da cidade. [Imaxe: Roberto Solano]
Abril: Clamor social polo indulto a David Reboredo
A loita social polo indulto de David Reboredo logrou unir a numerosas organizacións sociais, políticas e sindicais. Reboredo e a súa familia receberon o apoio da cidadanía e das institucións. [Imaxe: Aequistres]
Maio: Bucinas contra a estafa das preferentes
As persoas afectadas pola estafa das preferentes puxeron durante todo o ano a banda sonora nas rúas do centro da cidade. Sonadas pitadas e bucinazos impediron que o seu drama ficase no esquecemento. [Imaxe: Roberto Solano]
Xuño: O colapso nos servizos sociais faise evidente
A tramitación das chamadas "axudas extraordinarias para familias" visaron como nunca o colapso dos servizos sociais municipais. As longas ringleiras e a demora na tramitación provocaron enérxicas críticas e mobilizacións sociais.
Xullo: Pola readmisión de Paco e David
O despedimento dos traballadores Paco e David na factoría de PSA deu lugar a unha enorme demostración de solidariedade. Concentracións diarias, varias manifestacións e unha longa folga de fame por quendas insistiron en reclamar a súa reincorporación. [Imaxe: CIG]
Agosto: Espectáculo con nome de marisco
O Marisquiño consolidouse máis un ano como un festival de referencia, deixando imaxes tan impactantes coma esta.
Setembro: Abaixo a Cruz do Castro!
A decisión do goberno Caballero de non acatar a sentenza xudicial que obrigaba a retirar a Cruz fascista do Castro reavivou o movemento social que reclama a retirada definitiva de toda a simboloxía fascista na cidade. [Imaxe: CIG]
Outubro: Vigo asólagase
O paso do temporal Margit asolagou boa parte da cidade, deixando notar os seus efectos na zona centro mais tamén nas inmediacións do Estadio de Balaídos. [Imaxe: @ititon]
Novembro: Un atraco acaba en traxedia
Una policía y un atracador muertos y dos personas heridas tras un robo en un banco de Vigo http://t.co/woSt97u42D pic.twitter.com/LnwzkY6rMt
— La Voz del Tomebamba (@tomebamba) 28 novembro 2014
O atraco dunha oficina bancaria no Calvario que custou a vida a unha axente de policía e feriu de gravidade a outro, enloiteceu a cidade e abriu o debate arredor da necesidade de portar chaleques antibalas.
Decembro: #NonAoBarcoNaRotonda
O 2014 remata como empezou, con protestas cidadás. A decisión de Abel Caballero de instalar o barco Bernardo Alfageme na rotonda da Avenida de Castelao, contra o criterio da maioría do Pleno, topou cunha activa oposición entre a veciñanza de Coia que logrou paralizar por varias semanas as obras, enfurecendo ao rexedor. [Imaxe: Roberto Solano]