Compromiso por Galicia non participará nin de "mareas" nin de novas coalicións electorais en Vigo, que cualificaron de "aventuras". Así o anunciou a agrupación local de CxG a través dun comunicado no que trasladan publicamente a súa decisión de concorrer "en solitario" ás eleccións municipais previstas para o maio próximo.

Un acordo que aseguran foi adoptado "por ampla maioría" da súa militancia e que, na súa opinión, visa a súa confianza "no proxecto propio de carácter galeguista e progresista". Unha proposta  política que defenden está afastada "do radicalismo e populismo das distintas agrupacións e manifestos", nunha clara alusión á Marea de Vigo e outras iniciativas semellantes, algunhas inda en fase de xestación.

CxG carga contra os promotores destas novas fórmulas tras as que aseguran están "políticos locais de toda a vida". Unha crítica que se produce só unhas semanas despois de que Compromiso anunciase a fichaxe de Miguel Barrros, histórico dirixente e exconcelleiro do PSOE, que abandonou as filas socialistas hai varios anos e que se vén de incorporar á executiva local de CxG.