O BNG promove unha campaña solidaria con Palestina. En Vigo a recollida de medicamentos, gasas ou leite, para o seu envío á faixa de Gaza farase na sede da fronte nacionalista até o 10 de setembro.
No primeiro día de curso político o BNG conxuntamente coa Asociación galaico-árabe Yenin-comunidade palestina e a Fundación Araguaney, animaron a toda a sociedade viguesa a participar na campaña “Galiza con Gaza, mobilízate pola reconstrución e contra a agresión ao pobo palestino”, chamando a entregar material sanitario.
Entre os produtos necesarios indican vendas, gasas, elementos para sutura e curas, material protésico, antibióticos, analxésicos, betadine, esparadrapo, luvas estériles, cueiros e leite en po, que serán enviados á faixa de Gaza. A recollida farase até o vindeiro 10 de setembro na sede comarcal do BNG, na rúa Celso Emilio Ferreiro 3 baixo, en horario de 10 a 14h e de 17 a 20h.
Solidariedade fronte a destrución
A última agresión militar do Estado de Israel contra a poboación palestiniana na faixa de Gaza resultou en máis de 2.000 persoas asasinadas. O número de persoas feridas superou as 10.000. Para alén do máis, os bombardeos da aviación israelita provocou a destrución de 200 escolas, 15 hospitais e 17.000 vivendas, que deixaron sen fogar a 100.000 persoas, amais da única planta enerxética na zona.
A súa reconstrución está estimada nun custe de entre 3.000 e 4.000 millóns de euros, segundo cálculos das ONGs con presenza na faixa. As estimacións apuntan a que serán precisos até 20 anos de traballos para reconstruír o que os bombardeos destruíron en apenas dous meses.
Boicot aos produtos sionistas
Para expresar o rexeitamento contra as sucesivas agresións promovidas polo sionismo, o BNG súmase á campaña social polo boicot a Israel chamando a non mercar aqueles produtos que teñan etiquetas procedentes daquel país, como son todas as que comezan cos números 729. A fronte nacionalista desenvolverá tamén unha campaña axitativa nas rúas e nas redes sociais para expresaren “a solidariedade co pobo palestiniano e denunciar o masacre do que é vítima por parte de Israel”.
“Palestina só precisa que se cumpra o seu dereito á autodeterminación e ao retorno despois da ocupación ilegal de territorios gañados, unha e outra vez, nunha prolongada guerra de agresión”, recollése no material divulgativo do BNG. “Con todo, o pobo palestino resiste e é moi importante que continúen o compromiso e a denuncia internacionais, ao tempo que precisa toda a nosa axuda para reconstruír as consecuencias da barbarie” acrecentan.