Imprimir

A 'Acampada da Dignidade' trasládase ao pé da Cruz do Castro

Redacción | @VigoDixital | 13 de octubre de 2014

Activistas montan a acampada na Cruz do Castro

RSP e CGT tomaron a decisión ante o despregue policial e de bombeiros na praza do Rei para evitar que se instalaran fronte ao Concello. 

Mentres a atención se centraba na praza do Rei, onde un pequeno grupo se concentraba unha vez máis pola caótica xestión dos servizos sociais do Concello, outros membros do colectivo comezaban a montar unha nova acampada da dignidade na Cruz do Castro.

Ninguén agardaba que o lugar escollido sería o símbolo fascista, envolto nunha agre polémica nas últimas semanas.  A decisión tomouse ante o despregue policial e de bombeiros, que estaban preparados para evitar unha acampada fronte ao Concello.  

O desaloxo violento da primeira acampada, que foi retirada por decenas de axentes antidisturbios, de madrugada e sen aviso previo, non freou aos membros da Rede de Solidariedade Popular (RSP) e do sindicato CGT, que volveron a levantar as tendas xunto ao pé da cruz. Membros da plataforma Xuntos tamén participaron da acción.

Os acampados e acampadas non temen unha nova intervención das forzas de seguridade, que os sacaron a rastro das tendas no primeiro campamento. “Imos a resistir porque non nos queda outra, até que non se solucionen os graves casos das familias presentes e de moitas na cidade, non pensamos parar”, asegura un integrante.

Os colectivos preparan ademais unha nova concentración para este sábado 18 diante da Delegación da Xunta en Vigo. O colapso das axudas de emerxencia social e o retraso dun mes na resolución do cheque social, que comezou a pagarse esta segunda feira, volverán a ser o centro das reivindicacións.

Puede ver este artículo en la siguitente dirección http://vigodixital.opennemas.com/articulo/social/nova-acampada-da-dignidade-na-cruz-do-castro-pese-ao-desaloxo-violento-da-primeira/20141013123306000612.html

Vigo Dixital
© 2020 Vigo Dixital

VIGO dixital | Información local ao servizo da veciñanza
>Na Rede desde o 1 de setembro de 2014


     
Desarrollado por Openhost con:      
OpenNeMaS CMS OpenHost S.L. Opennemas CMS